“Á conquista da Costa Ártabra” nun festival que xunta mar e música de jazz. Con actuacións de balde en distintos espazos públicos para atraer novos afeccionados na comarca á música jazz. A organización explica que a sétima edición do festival abarca todas as cores do jazz, transitando desde propostas flamencas ao dixiland de Nova Orleáns, o gypsy ou a música swing, para recuncar na diversidade de interesantes proxectos galegos que pintan o jazz con trazos de neosoul, funk ou experimentación contemporánea, na procura de novas sonoridades. Completan o programa aulas de baile, un obradoiro para crianzas, e un roteiro pola costa que rematará cunha sesión de contos musicados dedicados ás mulleres do mar. O festival comezará o venres 18 no parque de Freixeiro coas actuacións de Josemi Carmona e Jorge Pardo. O sábado, durante todo o día, o parque acollerá a Romaría swing. En Neda, a ribeira de San Nicolás será de novo escenario da sesión vermú do domingo. Xa pola tarde, o Festival viaxa a Cedeira, ao parque de San Isidro, ao pé da praia da Magdalena, e tamén se incorpora como escenario o castelo da Concepción. Para rematar o luns na praia do Baleo, en Valdoviño.