O documento do gabinete lisboeta contemplaba unha forte rebaixa no gasto público e nas prestacións sociais e un aumento da carga impositiva para tentar conter o déficit do Estado. Toda a oposición, tanto á dereita como á esquerda do Partido Socialista, rexeitou o Programa de Estabilidade e Crecemento que José Sócrates ofreceu ao Goberno da Unión Europea e que, sometido á consideración do Parlamento de Portgual, tan só obtivo o apoio minoritario dos 97 votos da forza que sostén ao Goberno dentro dunha Cámara con 230 representantes. A renuncia do Primeiro Ministro deixa en funcións ao actual Executivo. O presidente Cavaco Silva abrirá a rolda de contactos previos á convocatoria de comicios cos partidos políticos este mesmo venres.