Segundo a asociación en defensa do galego resulta “indecente” que as administracións gobernadas polo Partido Popular concedan unha subvención de centos de miles de euros a “Sancho Gracia mentres nega o pan e o sal á cultura galega”. A entidade presidida por Carlos Callón sostén que o Festival das Rías Baixas “fede a electoralismo barato”.

Dende A Mesa pola Normalización denúnciase que o investimento serve para que Núñez Feijóo “unte aos seus amigos de Madrid” mentres lle “adebeda diñeiro ás compañías teatrais galegas, moitas delas ao borde do abismo. Ao mesmo tempo sinala a contradición existente entre o anuncio de que non se vai organizar a Feira das Artes Escénicas de Galicia por falla de orzamento e a programación deste novo evento. “Será porque lles sae moi caro Sancho Gracia”, resolve a entidade.

 

O comunicado da Mesa prodúcese o día despois de que o director da Axencia Galega das Industrias Culturais, Juan Carlos Fernández Fasero, defendese en comisión parlamentaria a programación cultural da Xunta, que cualificou como “austera”, pero dirixida ao público.