Na vindeira semana, dentro das actividades propostas no Festival Alternativo Millo Verde, celebrarase o primeiro mercado de troco en Redondela. Será na alameda de Redondela, o sábado 6 de xuño, de 17 a 20 horas, coincidindo con diferentes obradoiros de xogos populares. Nel todas as persoas que queiran poden traer obxectos en bo estado e que non necesiten para intercambialos por outros. Desde libros, discos, electrodomésticos pequenos, roupa ou complementos, ata xoguetes.

Estas actividades son o pistoletazo de saída da celebración do Festival Foliada Redondela 09, que terá lugar a fin de semana do 11 ao 13 de setembro. Trátase dun festival-intercambio cultural entre Galicia e Catalunya, cun marcado espírito analítico e de acción social, sen por iso desatender o aspecto lúdico e festivo. Este festival, que vai pola súa 4ª edición, celébrase alternativamente en Nou Barris (Barcelona) e nunha vila galega. Este ano a vila galega escollida foi Redondela e o eixo temático do Festival será os "Hábitos de consumo e mobilidade".