Trátase dun centro no que os empregadores recibirán apoio nas diversas etapas do proceso de contratación, como asesoramento e acompañamento para a definición das súas ofertas de emprego e apoio no proceso de selección de candidatos, incluíndo un despacho específico para a realización de entrevistas.
Ademais, no centro de Zalaeta controlaranse e seguiranse exhaustivamente as ofertas que non acaden demanda, xa que, segundo incidiu Mato, “nesta época de crise ningunha oferta pode quedar sen cubrir”. Así mesmo, os empregadores recibirán información e formación sobre contratos, incentivos, cualificacións e plans de formación.
“Tamén pensamos nos emprendedores e, por iso, desde esta oficina prestaráselles o apoio necesario para a posta en marcha dos seus proxectos”, apuntou a conselleira.
A finalidade desta iniciativa novidosa é mellorar a eficacia da intermediación laboral. “Con este proxecto Galicia sitúase novamente á vangarda da mellora dos recursos públicos de emprego”, destacou a titular de Traballo.
Nesta aposta da Xunta por mellorar a eficiencia do Servizo Público de Emprego, Mato lembrou que a Xunta está a investir desde o ano pasado 7,5 millóns cada exercicio ata 2013 nun plan de modernización acordado cos empresarios e sindicatos no seo do diálogo social.
Ao respecto, sinalou que desde o ano pasado se están a desenvolver obras de mellora na rede de oficinas da Xunta, así como avances na posta en marcha da oficina virtual. Ademais, resaltou que o próximo mes de abril estará rematado o proceso de clasificación do 100 por cento dos demandantes. “Este labor será o punto de partida que garantirá a correcta orientación dos desempregados cara aos itinerarios con mellores perspectivas de inserción laboral”, concretou.
Por último, a conselleira animou aos empresarios e emprendedores a aproveitar “ao máximo” as posibilidades que ofrece a nova oficina de Zalaeta, xa que apuntou que con estas instalacións “Galicia colle novos pulos para saír desta conxuntura máis forte, con máis e mellores servizos e con máis e mellores empregos”.
