O presidente provincial do PP en Ourense, Manuel Baltar, referiuse este xoves á situación xudicial dos concelleiros do seu partido no Concello de Santiago e aos afiliados para asegurar que: "Os códigos éticos dos partidos están para cumprilos e non se pode permitir ningún tipo de excepción".

   Baltar presentou este xoves a súa proposta persoal de Código Ético da Deputación de Ourense e, tras a rolda de prensa convocada para dala a coñecer, respondeu a preguntas sobre a aplicación do código ético do PPdeG, fóra da sala con distintivos institucionais da Deputación provincial.

   No caso de Santiago, Baltar manifestou non ter "ningunha dúbida de que se cumprirá o código ético" porque "os códigos éticos dos partidos están para cumprilos, e se non é así, perden a súa función".

   Ademais, admitiu tamén descoñecer "exactamente" a situación de "eses afiliados ao PP" de Santiago. "Tampouco pertenzo ao comité de dereitos e garantías do PPdeG, pero polo que a min respecta, como presidente provincial do partido, coñezo casos de afiliados en determinada situación xudicial, con apertura de expedientes informativos e mesmo, coa vontade dalgúns de pedir a suspensión de militancia, e iso xestiónoo na provincia", sostivo