A frouxa tempada de inverno ten todos os visos de compensarse coas rebaixas. A apertura dos establecementos na festividade de San Xiao, patrono de ferrol e primeiro día das rebaixas supón todo un acerto para os comerciantes. Rexistráronse moitas transaccións e a perda dese día significaría un duro golpe para o comercio ferrolán, asegurou García Nores. Antes desta medida a cidade estaba morta e falta de vida e agora a situación é totalmente distinta.

Ante a crise "a situacións difíciles solucións máis fortes". Así pódense atopar descontos desde o 20 % ata o 60 %. E isto nas primeiras rebaixas, pois máis adiante subiranse os descontos porque o “que interesa é sacar a mercancía que pasa de moda a calquera prezo.”

A Asociación de comerciantes de A Magdalena arrinca o ano con ilusión e optimismo. “A situación económica crea tamén unha crise psicolóxica e resulta vital non frear o consumo para non parar o ciclo produtivo, por iso facemos un discurso positivo”, salientou o Presidente da CCAM.

Deste xeito comezan con novos proxectos como a tarxeta de fidelización de clientes nos que van acumulando puntos e descontos. A novidade máis salientable é a creación dun oulet permanente. Esta semana levarán a cabo a primeira reunión dos asociados para establecer os primeiros pilares do mesmo. Senón hai retrasos a finais de primavera abrirase este oulet do barrio da Magdalena.

Cristobal García, sinala a transformación que están a experimentar. Xa non son exclusivamente unha asociación de comercios. Aspiran a crear un espazo aberto delimitado polo barrio onde se inclúan hostaleiros, avogados e demais grupos de profesionais.” As rúas deben estar cheas de xente e esta é unha forma de acadar este obxectivo”, sinalou .