Na querela do PSdeG denúnciase que cando exercía de responsable de Infraestruturas da Deputación de Pontevedra, Agustín Hernández certificou á súa antiga empresa unha obra en construción. Concretamente, trátase da estrada coñecida como variante de Lira, licitada en preto de 400.000 euros e adxudicada en 2006 pola institución provincial á construtora Sercoysa, coa que Hernández traballara antes de asumir o cargo público. O agora conselleiro tería ratificado a finalización duns traballos cando aínda estaban no inicio da súa realización. A Deputación de Pontevedra xustificou a irregularidade por ser esa certificación falsa a única maneira de non perder as achegas da Unión Europea que financiaban a obra.

Os socialistas galegos presentaran a querela contra Hernández en maio de 2009, pouco tempo despois de que se coñecese que asumía a Consellaría de Medio Ambiente. O posterior recurso do afectado foi desestimado, e o Tribunal Superior de Xustiza de Galicia decidiu incoar sumario polos delitos de “falsidade en documento oficial, estafa e ou fraude á Administración Pública” contra Agustín Hernández e o enxeñeiro da Deputación pontevedresa, Baltasar Pujales. O alto cargo da Xunta terá que declarar o venres pola mañá sobre a certificación da variante de Lira.