ACTUALIDADE
-
Novas
Novas sobre programas, emisoras,... Todo o mais actual e de interese nesta sección.
-
Radio á carta
Escoita online os podcasts dos teus programas favoritos de Radiofusion.
Praza Alcalde Ramón Souto s/n, 15500 Fene (A Coruña) Galicia - Tfno. 981 492 773 - noticias@radiofusion.eu
Facebook
Twitter
As Anpas galegas e os sindicatos do ensino reclaman á administración que se dea por concluído oficialmente o curso escolar o 13 de marzo de 2020 e que a avalización teña en conta os contidos dados ata esa data.
A confederación de Anpas Galegas e os sindicatos do ensino teñen tomada unha decisión, que se dea por rematado o curso escolar oficialmente no día 13 de marzo pasado. O día 12 foi o último día de clases presenciais. “O que houbo despois non son clases homologables” afirma o representante das Anpas galegas, Fernando Lacaci, quen engade que “antes de deixar a ninguén atrás hai que parar formalmente o curso” o que non quere dicir que se siga coa actividade telemática ata xuño.
Fenda dixital
Se algo deixou claro esta crise sanitaria foi a incapacidade tecnolóxica que fallou polo menos no ensino, e a fenda dixital que tamén quedou patente. Moitos fogares non teñen conectividade a internet nin equipos; profesorado e alumnado non souberon como afrontar a falta de experiencia, e a realidade demostrou a incapacidade para seguir con normalidade as clases. Asegura Lacaci en nome das Anpas que “o esforzo e a ilusión son valorables pero non son clases, non substitúen a docencia e as familias tampouco somos docentes”.
Criterios de avaliación
En relación aos criterios de avaliación, as Anpas e os sindicatos do ensino propoñen que se teñan en conta os contidos dados ata o dia 13 de marzo, extrapolándoos ao curso completo. Entenden que, dadas as circunstancias, debería tenderse a unha flexibilidade na promoción de curso para a maioría do alumnado. Afirma Fernando Lacaci que a comunidade escolar falou e que a Administración debera escoitar e aceptar estas propostas. É urxente, afirma o representante das Anpas, adoptar unha solución porque hai que deixar deseñado o próximo curso para que este comece, en canto a contidos, onde quedou o 13 de marzo.
Publica o teu comentario agora