Comercio alternativo e equitativo na relación entre produtores e consumidores, que ofrece calidade a cambio dun ingreso digno e respectando garantías dunha elaboración en condicións de igualdade, sen discriminación, sen explotación, con criterios ecolóxicos e preservando o medio. Todo iso figura nunha definición máis académica da xustiza comercial, baixo cuxos principios celebrarán o Día Internacional as organizacións solidarias galegas con actos en Santiago, Pontevedra, Ourense e Vigo.

Desta volta, a organización Amarante quere chamar a atención sobre a responsabilidade das grandes superficies comerciais na explotación de millóns de persoas. A directora de Amarante, Nanda Couñago salienta que “tres ou catro grandes compañías controlan o 40 por cento do mercado da distribución alimentaria” e denuncia que, como está a demostrar a crise do sector lácteo galego, axustan demasiado as marxes de beneficio. As cadeas internacionais venden “alimentos viaxeiros”, que viaxan miles de quilómetros, xerando gran impacto no medio. Ademais, Amarante chama a atención sobre produtos non alimentarios, como a roupa. Un informe da asociación denuncia que Carrefour produce textil en condicións de explotación en Bangladesh.