Un gran soño foi un dos 280 proxectos procedentes de 22 países que optaban ao certame, organizado polo Departamento de Educación do Concello de Santiago e Kalandraka Editora. Ao acto institucional, encabezado polo alcalde, Xosé Sanchez Bugallo, asistiron a concelleira de Educación, Mercedes Rosón, o director de Kalandraka, Xosé Ballesteros, o ilustrador e xurado do Premio, Xosé Cobas, membros da Corporación Municipal de Santiago e personalidades vinculadas á cultura e a docencia en Galicia.

Para esta obra evocadora da mitoloxía maia, o universo e o Camiño de Santiago, a portada incorpora elementos fosforescentes que brillan na escuridade e os lectores infantís poden xogar a crear constelacións coas estrelas adhesivas que inclúe o libro nunha lámina anexa.

O II Premio Internacional Compostela destaca pola súa riqueza visual, a perfección técnica e o calado da súa mensaxe, alcanzable para todos os públicos. A edición completa consta de 20.000 exemplares en sete linguas: castelán, galego, catalán, eúscaro, portugués, inglés e italiano, ás que se suma unha oitava versión en español para o mercado mexicano.