A praza de Amboaxe recibirá esta noite a visita de Erik Jiménez e o seu espectáculo “La 8”. Será a partir das 8:30 cando o laboratorio coreográfico de Jiménez pise a rúa e nunca mellor dito, xa que o espectáculo comezará na confluenza das rúas Dolores e Sánchez Barcáiztegui chegando máis tarde á praza de Amboaxe. O nome de “La 8” ten relación co barrio no que naceu este creador, polo tanto a peza recolle todo aquilo que o influiu como artista, facendo fincapé no popular. Este espectáculo de danza conta coa participación de 13 bailaríns do Centro Coreográfico Galego. Despois desta actuación, a danza non acaba, e é que Kirenia Martínez presentará o seu espectáculo “Kira” ante o público ferrolán. A entrada a estes dous espectáculos é de balde.