Con todo, non deixa de sorprender que sexa o partido que detenta o Goberno de Galicia quen poña os cartos dunha viaxe que a propia Administración galega anunciou nun comunicado da Consellaría de Presidencia como “visita institucional á República de Venezuela”. O programa da visita, que figura na web da Xunta, non fai mención expresa a ningún acto de partido, que si se produciu e pon o acento no carácter oficial da viaxe. Porén, agora o PPdeG confirma que o Goberno autonómico realiza algunhas das súas actividades institucionais a conta dos seus fondos.