Ramón Villares, Presidente do Consello da Cultura Galega, indicou no acto inaugural da Xornada que o sector da literatura infantil e xuvenil en Galicia é o que máis vendas alcanza e o que sostén a industria literaria galega.

Pola súa banda, outra das asistentes a este acto, a representante da Sección de Crítica da AELG, Blanca-Ana Roig, considera que o coñecemento da produción da literatura infantil e xuvenil galega  é imprescindible para que os novos filólogos e mestres se animen a facer crítica literaria. Por este motivo, mostrou a súa preocupación pola actuación das autoridades da Universidade, que segundo a súa opinión, están privando aos universitarios deste coñecemento.

A Xornada, cuxa programación consistiu en diversas conferencias  e unha mesa redonda, rematou cun debate final entre todos os asistentes, sobre a presenza e a ausencia da crítica literaria sobre a Literatura infantil e xuvenil.