Modifícase a catalogación de establecementos, recuperando a figura da pensión, que substituirá á da residencia turística por non ter esta última, segundo o Goberno, “recoñecemento no mercado”. Volve tamén a categoría de hotel-apartamento e diferéncianse apartamentos e vivendas de vacacións. Ademais créase a aldea rural para o conxunto de máis de tres edificacións de turismo rural que formen parte dun establecemento único. De agora en diante, os establecementos de restauración serán restaurantes, cafetarías ou bares e se os furanchos que abundan no sur de Galicia para darlle saída ao viño excedente queren servir tamén comidas deberán acollerse a algunha desas figuras. 

Con todo, o máis destacado da lei é a liberalización dos trámites para por en marcha unha empresa turística. De agora en diante, o titular do negocio poderá saltar toda a burocracia previa e abrir o seu establecemento tan só con asinar unha “declaración de responsabilidade”. Bares e pensións poderán funcionar antes de que a Xunte acredite que cumpren coa lexislación vixente, algo que a Administración revisará nun prazo de tres meses dende a súa apertura.

Ademais, a Xunta aprobou nesta xornada o Proxecto Sectorial para o novo polígono industrial do Barbanza que abrangue unha superficie de 900.000 metros cadrados entre Ribeira e A Pobra do Carmiñal. O investimento previsto supera os 54 millóns de euros e as obras de construción poderían comezar en 2012.