A XIV edición do Torneo de Tiro Olímpico Cidade de Ferrol comezará este domingo ás 10 da mañá e rematará  sobre a 1 do mediodía coa entrega de premios aos mellores clasificados. A cita deportiva congregará aos mellores deportistas desta modalidade do panorama galego. O Presidente do Club de Tiro Olímpico O Castro, Ramiro Pose, destaca a presenza do campión galego, o local Darío Piroscia Penado, recentemente proclamado campión do Torneo Cidade da Coruña. Tamén hai que salientar a participación  dos irmáns Múñiz. A competición disputarase na modalidade de pistola estándar, calibre 22 milímetros. Comprenderá tres series de 20 disparos, cada un a intervalos de cinco detonacións. Na primeira quenda a silueta permanecerá enfronte do tirador por espazo de 150 segundos. Na segunda farase en 20 segundos e na terceira e última o intervalo será de 10 segundos. O Concelleiro de Deportes de Ferrol, Manuel Santiago e Ramiro Pose convidaban á cidadanía ferrolá a asistir a este evento deportivo que se caracteriza pola súa dificultade e vistosidade. A entrada é libre e de balde.