Perante a posibilidade que os últimos datos de paro, con preto de 300.000 afectados en Galicia e seis millóns no Estado, desemboquen na convocatoria dunha nova xornada de folga xeral, as centrais discrepan. Sánchez Aguión explica que para CCOO “a folga hai que manexala con coidado” e que nunha situación de precariedade en moitos fogares “chamar aos traballadores á perda dun día de salario hai que facelo con moita responsabilidade”. Para Seixo, dende o punto de vista da CIG “hai condicións obxectivas para ir a outra folga, pero restan as subxectivas” e teima en que cómpre manter a presión na rúa para que o Goberno “dimita e se vaia”.