Apash na lingua indíxena significa, precisamente, “os que veñen de fóra” e que non adoitan ser moi ben recibidos polos poboadores da selva. O motivo, as ameazas que para estas comunidades supoñen “as novas formas de colonialismo” que están a destruír o seu sistema de vida baseado na comuñón coa natureza. Os indíxenas están a sufrir unha contaminación bestial e morren envelenados polo chumbo das minas.

Ante esta situación, Cora Peña sentiu a necesidade de darlles voz, xa que o Goberno peruano censura calquera información ou medio do país que se faga eco das demandas dos xíbaros. Non obstante, a directora galega tamén convida á reflexión aos que vexan a cinta, xa que asegura que “todos somos culpables desta situación”.

Nos vindeiros meses Peña agarda mover por diferentes festivais Apash, os de fóra e tamén está prevista a súa exhibición na TVG.