O 2009 foi un ano difícil para moitas familias de Fene, segundo relataron a Radiofusión Mari Carmen Rama, Carmen Seco e Mari Carmen Grueiro, directivas e tres das fundadoras da agrupación local de Cáritas.

Na actualidade esta organización atende regularmente a quince familias do concello aínda que, polo Nadal, a cifra se incrementa ate as vintecinco ou vinteseis xa que, normalmente, tamén se lle entrega a cesta a determinadas familias que ao longo do ano van subsistindo pero que, chegadas estas datas, non se poden permitir nin o máis mínimo exceso.

A Campaña de Nadal de Cáritas Fene prolongarase ate o 21 de Decembro nos establecementos colaboradores. Do 9 ao 18 tamén se poden entregar os víveres no local parroquial da rúa de Conces nº 10, entre as cinco e as sete da tarde.

A partir do día 21, e antes da Noiteboa, voluntarias da organización procederán ao reparto das cestas entre as familias.