Neste mes de febreiro serán 257 os alumn@s que, xunto cos seus profesores, coñecerán as instalacións de Reciclaterra, e en marzo, a cifra ascende inicialmente a 383. Para abril hai xa concertadas 167 visitas e outras 53 para o mes de xuño. Na iniciativa participarán asociacións e colexios como Aspanaes, Lestonnac, Cristo Rey, San Xoán de Filgueira, La Salle ou CEIP Recimil de Ferrol; CPI A Xunqueira de Fene; CEIP Ponte Xubia ou Maciñeira de Neda; Piñeiros (Narón), CEIP Andrade de Pontedeume, ou San Marcos, de Abegondo, entroutros. 

Para participar na oferta de obradoiros, dirixida aos escolares de Educación Infantil, Primaria e Secundaria como complemento do ensino regrado, así como a todos aqueles colectivos que estean interesados en realizar actividades medioambientais, é preciso que un responsable do centro contacte previamente co persoal da Aula para establecer os contidos e as condicións da visita, a súa data e duración. Poden facelo a través do correo electrónico reciclaterra@gmail.com. ou do número de teléfono 630 969 763.   

As instalacións dan a coñecer aos visitantes a vida últil de produtos e residuos e o seu posterior tratamento, intentando promover ao mesmo tempo hábitos positivos de consumo. Para iso, o persoal da Aula ofrece información, itinerarios guiados polo seu interior e unha proposta de actividades adaptada á idade dos visitantes e ao tempo do que dispoñan. Todas as propostas son gratuítas, co obxectivo de contribuír á conservación do entorno reducindo, reciclando e reutilizando os residuos. O horario de visitas é de martes a venres, de 10.00 a 16.00 horas, e as fins de semana de 11 a 14.30 horas. Os luns as instalacións permanecen pechadas. 

Ademais de coñecer as instalacións e realizar un percorrido polos paneis informativos e elementos didácticos da aula, pódese participar nunha ampla oferta de actividades (un total de 22). Entre os seus obxectivos figura motivar aos nenos mediante xogos para captar a súa atención respecto a valores medioambientais, dar a coñecer a importancia do lixo e do proceso de separación dos residuos, coñecer os riscos que conlevan os residuos produto das actividades humanas acumulados nas praias ou concienciar aos rapaces da importancia do respecto ao medio ambiente. A través destes obradoiros tamén se persegue diminuír a cantidade de lixo xerado a través da reutilización e a reciclaxe, reflexionar sobre a cantidade de embalaxes innecesarios que empregamos na vida cotiá ou o establecemento de criterios de aforro e selección de embalaxes.