O persoal de limpeza viaria e recollida de residuos sólidos urbanos de Santiago de Compostela está disposto a ir a unha folga indefinida a partir do 21 de xullo se a adxudicataria, Urbaser, persiste na pretensión de recortar dereitos laborais e sociais.

O pasado 31 de decembro de 2012 finalizou a vixencia do convenio colectivo que regula as relacións laborais en Urbaser no seu centro de traballo compostelán. Por esas datas, a empresa e o comité constituíron a mesa negociadora coa intención de acadar un acordo para o asinamento dun novo convenio.

Despois de máis de dez reunións, non foi posible chegar a acordos porque Urbaser pretende acometer recortes laborais e sociais «sen xustificación», xa que o Concello de Santiago non lle aplicou á empresa recorte ningún e continúa a pagar o canon establecido no seu día no preceptivo contrato.

Por esta razón, mañá venres, día 12 de xullo, comezarán as mobilizacións do persoal, que se concentrará ás 12 h na dársena de Xoán XXIII para, posteriormente, manifestarse ata o Pazo de Raxoi.

Como xa se indicou, no caso de que non se chegue a ningún acordo nos próximos días, o persoal comezaría unha folga indefinida a partir do día 21. Sabendo as molestias que podería ocasionar a paralización do servizo de recollida do lixo, o persoal de Urbaser pídelle á cidadanía a súa comprensión.