“O conselleiro minte sen ningún pudor. Ao PP nunca lle interesaron os problemas dos gandeiros, nunca defendeu os intereses de aqueles que viven no rural. Utilizounos unicamente como base electoral e segue, e demóstrao continuamente, querendo utilizalos sen ningunha vergoña”, opinou Verdes.

A parlamentaria lucense explicou os antecedentes que ten a fixación de cotas e culpou ao Partido Popular de “perder o 20% do total da cota asinada”. “Foi o PP quen defendeu en Europa a liberalización das cotas, foron os gobernos de Fraga e de Aznar os que permitiron a especulación coas cotas. (...) Foi o PP o que repartiu no 2003, sendo Arias Cañete Ministro de Agricultura, 550.000 toneladas gratuítas de cota procedente de Europa, seguindo o criterio da proporcionalidade para evitar desequilibrios territoriais. Daquela perdeuse a oportunidade para reestruturar e redimensionar as explotacións leiteiras galegas”, expresou Sonia Verdes.

A deputada pediu ao goberno da Xunta que comece a “poñer en marcha políticas encamiñadas a facer as explotacións máis competitivas e a mellorar a súa rendibilidade”. A vilalbesa incidiu en que “se non se resolve o problema de falta de liquidez que están a sufrir as explotacións galegas, neste momento, moitas terán que pechar as portas, e daquela entón si que non nos quedarán explotacións polas que loitar”.

A Verdes non lle convencen as medidas adoptadas polo executivo autonómico e cualificou o adianto da PAC como “un parche, que non resolve nada”, ademais de adiantar que “os gandeiros non poderán dispoñer das axudas ata o 15 de xuño, cando o Conselleiro prometeu as axudas para o 1 de xuño”. Segundo a deputada do PSOE, desde a Xunta “venderon unha medida estrela que se desinfla soa que supón pan para hoxe e fame para mañá e todo o demais é fume, propaganda e charlatanería barata”.