Anxo Sangiao e Francisco Seoane son alumnos do ciclo de soldadura no IES de Fene e xa teñen experiencia no reto Hiperbaric. Raquel Pena e Marcos González estudan o ciclo de electromecánica de vehículos e póñense a proba por primeira vez. Os catro e o profesor Miguel Couñago explicaron en Radio Fene como marchan os traballos de deseño do vehículo de inercia co que aspiran gañar o desafío Hiperbaric Challenge. Un programa educativo dirixido a estudantes de 3º e 4º da ESO, de Bacharelato e ciclos formativos de Formación Profesional que promove a empresa Hiperbaric. O reto supón perder recreos e facer horas extra ao alumnado e a profesores, pero non lles importa. Valoran, sobre todo, o moito que aprenden e o que aporta o feito de traballar en equipo. “Apréndese moito máis, xestionas e aprendes a traballar en equipo”, declara Anxo. “Implica ter a idea e pasala á realidade”, explica Francisco. Para Raquel, a experiencia “é divertida, paréceme perfecto”. “É un proxecto moi bonito”, apunta Marcos. Ademais de deseñar o vehículo, o alumnado aprende a sacar adiante unha idea. “Hai unha parte de proxecto empresarial, de marketing e publicidade”, lembra o profesor. “Tripitimos? o noso equipo gañou as dúas última edicións deste reto...será posible gañar a terceira consecutiva?”, preguntan.