A nova escola infantil de Fene, que terá 41 prazas distribuídas en 3 unidades, permitirá aumentar nun 40 por cento a oferta para nenos e nenas de 0-3 anos da localidade. Coa posta en marcha deste centro, haberá un total de 102 prazas da rede A Galiña Azul neste municipio.

Así o resaltou hoxe a conselleira de Traballo e Benestar, Beatriz Mato, que se reuniu co alcalde da localidade, Gumersindo Galego. Na xuntanza tamén tomou parte a delegada territorial da Xunta na Coruña, Belén do Campo. Posteriormente, desprazáronse ata as dúas posibles ubicacións que acollerán o novo centro educativo.

O investimento para esta nova escola infantil ascenderá a 410.000 euros.

Este proxecto inscríbese na aposta do Goberno galego por “facer posible a conciliación da vida laboral e familiar”, destacou Mato. Para avanzar neste obxectivo, na pasada lexislatura puxéronse en marcha 3.000 prazas públicas, un 55 por cento máis das que había en 2009.

“Unha aposta á que imos dar continuidade na presente lexislatura. Catro anos nos que temos previsto crear 3.500 novas prazas”, salientou a titular do departamento autonómico. Ao respecto, precisou que deste total 2.100 xa están planificadas e asinadas en convenios e, destas, 700 estarán rematadas antes de que finalice este mesmo ano.

A conciliación, reflexionou Mato, “é un dos retos do noso tempo”, e supón ao mesmo tempo un dos ámbitos nos que se debe incidir para facer fronte ao “problema demográfico que sufre Galicial”. Por iso, a creación de prazas de 0-3 anos é un dos eixes principais do Plan de dinamización demográfica que se vai desenvolver esta lexislatura.