O mestre de finanzas asegura que, na situación actual, “por en dúbida as caixas é lóxico” e lembra que Novacaixagalicia non é xa o que eran as caixas en 2005: “ten serios problemas”. A Salcines amólalle que se fale de “cambio de regras do xogo” porque asegura que non houbo ningunha mudanza e que os directivos das entidades tiñan claro dende hai meses que se ía chegar a este punto. Arestora cómpre apostar por unha entidade que “dea servizo aos clientes, teña aquí as súas oficinas centrais -polo emprego que iso supón-, e que teña capacidade investidora”, e para iso, hai que pasar pola bancarización, opina. Venancio Salcines que as análises que se están a facer son máis políticas que técnicas e opina que agora o que precisa o sistema é un achegamento “puramente financeiro”. Fronte á opinión da Xunta e das caixas de que os seus datos de morosidade derivada do mercado inmobiliario son bos, o profesor declarou a Radiofusión, que son a demostración dos seus problemas de solvencia.