En 2008, o número de empresas propiamente culturais censadas en Galicia era de 2.100, a metade delas dirixidas ao produto gráfico, con cadansúa quinta parte figuraban as do audiovisual e a música, e arredor dun 8 por cento traballaban no sector das artes escénicas. Tanto a súa facturación, como o emprego asociado a elas medrou paseniño nos últimos tempos. Segundo o director da AGADIC, Juan Carlos Fasero, os postos de traballo non están moi consolidados, pero si que se xeran con continuidade.

 

As verbenas son o negocio musical máis próspero: xeran 94 millóns anuais e crean 4.500 empregos. Séguenlles os festivais de música, as rodaxes audiovisuais e o teatro. Con todo, a gran maioría das industrias culturais galegas existen en réxime de autoemprego ou contan con menos de 10 traballadores. A atomización do sector, xunto coa pouca exportación dos produtos son as eivas do sector no que a crise se deixa notar, pero menos grazas á súa capacidade de adaptación, tal e como explicou Fasero  durante a presentación do informe.