Nesta ocasión, o vehículo a empregar por Vigo e Ameneiro será o Renault Clio Rally5. O motivo de baixar do Peugeot 208 Rally4 ao Renault Clio Rally5 é principalmente orzamentario, xa que este vehículo é máis económico. Ademais, dada a regulamentación deste campionato de Europa, o competir cun vehículo inferior non significa que un leve menos puntos se é quen de obter un bo resultado de entre os coches similares ao seu. Desta forma, o equipo espera manter unha boa batalla coa pilota romanesa Catherine Radulescu, en 4ª posición do certame, xusto por detrás deles e de paso, dar o salto ao 2º posto da xeral do campionato, tras a sorpresa que se levaron ao non estar inscrito o equipo búlgaro que ocupa a 2ª praza, case empatados a puntos. 
“Hai 2 anos estivemos en Suíza e foi marabilloso sentir a calor da gran afección galega que nos animou e visitou na nosa estancia na súa terra de adopción. Nesta ocasión, o rallye celébrase nunha zona moi próxima e esperamos poder volver sentir a súa calor, xa que parece posible que nos atopemos neve nos tramos” indica Édgar Vigo.

“Continúo con pequenas molestias nas costas que non fun quen de curar completamente tras o rallye de Eslovenia. Espero que o frío que se espera non teña un efecto negativo sobre o meu corpo. No aspecto deportivo, totalmente enchufados para lograr sumar e mellorar a nosa clasificación e afianzarnos para a consecución do subcampeonato europeo” apunta Fátima Ameneiro.

Os recoñecementos levaranse a cabo nas xornadas do martes e mércores, o shakedown o xoves e a competición propiamente dita, ao longo do venres e sábado, momento no que se finalizará a proba.